प्रेस विज्ञप्ति
संवाद मार्फत शिघ्र सहमति खोज्न सरकारलाई आग्रह
विगत १४ दिनदेखी अनसनरत सत्याग्रही डा. गोविन्द केसीको विग्रदो स्वास्थ्यअवस्थाप्रति मानव अधिकार तथा शान्ति समाज चिन्तित भएको छ । विगतदेखी वर्तमानसम्मका सरकारहरुले डा. केसीसँग गरेका सहमतिका सन्दर्भमा छलकपटपूर्ण व्यवहार दुर्भाग्यपूर्ण छ भने पछिल्लो चरणमा अपमानजनक व्यवहार निन्दनीय छ । एक निष्ठावान सत्याग्रहीप्रति सम्मान प्रकट गर्दै संवादमार्फत शिघ्र सहमति खोज्न र संवेदनशील बन्न मानव अधिकार तथा शान्ति समाज सरकारसँग आग्रह गर्दछ ।

समाजका तर्फबाट
सुशिल बस्नेत
महासचिव, मानव अधिकार तथा शान्ति समाज
केन्द्रिय कार्यसमिति
मिति ः २०७७ असोज ११

प्रेस विज्ञप्ति
११ श्रष्टाहरु विभिन्न पुरस्कारद्वारा सम्मानित
श्रष्टा सम्मान अभियान अन्तर्गत मानव अधिकार तथा शान्ति समाजद्वारा स्थापित विभिन्न पुरस्कारहरुद्वारा ५ महिलासहित ११ जना श्रष्टाहरुलाई सम्मान गरिने भएको छ । यस क्रममा वर्ष २०७७ सालको कृष्णकुमारी दाहाल शान्ति श्रष्टा सम्मान अशेष मल्ललाई, पवित्रादेवी चौलागाई मानव अधिकार श्रष्टा सम्मान आहुति (विश्वभक्त दुलाल)लाई, राधादेवी दाहाल सद्भाव श्रष्टा सम्मान नीलम कार्की निहारिकालाई, चन्द्रकला खनाल अहिंसा श्रष्टा सम्मान व्याकुल माइला (प्रदिपकुमार राई) लाई, ज्ञानप्रसाद खनाल सहिष्णुता श्रष्टा सम्मान प्रमोद प्रधानलाई र महाप्रसाद रिजाल लोकतन्त्र श्रष्टा सम्मान गोविन्दराज विनोदीलाई प्रदान गर्ने निर्णय गरिएको छ ।
यसैगरी जोगमाया बराल श्रष्टा सौगात ज्ञानुवाकर पौडेललाई, राधादेवी दाहाल श्रष्टा सौगात श्रेष्ठ प्रिया पत्थरलाई, भुमीप्रसाद बराल श्रष्टा सौगात वसन्ती शाहीलाई, श्रीप्रसाद दाहाल श्रष्टा सौगात बालिका चौधरीलाई, श्रीनारायण दाहाल श्रष्टा सौगात रेणु गुप्तालाई प्रदान गर्ने निर्णय गरिएको छ । पुरस्कृत श्रष्टाहरु ५ जना महिला श्रष्टासहित ७ वटै प्रदेशका हुनुहुन्छ । महाकवि लक्ष्मीप्रसाद देवकोटाको जन्मजयन्तिका दिन विशेष कार्यक्रम आयोजना गरि जनही रु. २० हजार पुरस्कार राशीसहित पुरस्कृत श्रष्टाहरुलाई सम्मान गर्ने कार्यक्रम रहेको छ ।
एक दशक अगाडिदेखी मासिक शान्ति काव्य प्रवाह आयोजना गर्दै आएको शान्ति समाजले साहित्यको आराधन र श्रष्टा सम्मानलाई अभियानको रुपमा अघि सारेको छ ।
पुरस्कृत श्रष्टाहरुबारे ः
वि.स २०११ साल चैत २१ गते धनकुटा जिल्लामा जन्मनुभएका श्रष्टा अशेष मल्लका ‘सडकदेखी सडकसम्म’ नाटक संग्रहसहित दुई दर्जन कृतिहरु र सयौ रचनाहरु प्रकाशित भएका छन् । नेपालमा सडक नाटकको जन्मदाताका रुपमा परिचित मल्लले शान्ति, मानव अधिकार, लोकतन्त्र, सामाजिक न्यायका पक्षमा समेत गरि १ सय भन्दा बढी सडक नाटकको लेखन÷निर्देशन गर्नुभएको छ ।

२०२४ साल चैत १ गते काठमाण्डौमा जन्मनुभएका श्रष्टा आहुति (विश्वभक्त दुलाल)का ‘नेपालमा वर्ण व्यवस्था र वर्ग संघर्ष’सहित ५ वटा पुस्तक प्रकाशित छन् । सामाजिक न्याय र दलित मुक्तिको आन्दोलनका अथक योद्धा आहुतिका हजार भन्दा बढी लेख रचनाहरु विभिन्न सञ्चारमाध्यममा प्रकाशित भइसकेका छन् ।

२०३१ चैत २७ गते पाल्पामा जन्मनुभएकी श्रष्टा नीलम कार्की निहारिकाका बहुचर्चित उपन्यास योगमाया, चीरहरण, त्रिचालीस कथा (कथा संग्रह) सहित ११ वटा कृतिहरु प्रकाशित छन् । ऐतिहासिक विषयमा रुची राख्ने र इतिहासका पात्रलाई आख्यानमा ढाल्न रुचाउने कार्की उपन्यास र कथाको क्षेत्रमा चर्चित हस्ताक्षर हुनुहुन्छ ।

२०२९ चैत २५ गते ओखलढुंगामा जन्मनुभएका नेपालको राष्ट्रिय गानका रचयिता व्याकुल माईला (प्रदिप कुमार राई)का ‘विउ अक्षर’ (वाम्वुले राई भाषामा) सहित २ वटा कृतिहरु र दर्जनौ रचना प्रकाशित छन् ।

२०१५ असोज १५ गते विराटनगरमा जन्मनुभएका श्रष्टा प्रमोद प्रधानको ‘नेपाली बाल साहित्यको इतिहास’ लगायत ३२ वटा कृतिहरु प्रकाशित भएका छन् । त्यसमध्ये आधा दर्जन बढी कृति समालोचनाका र २१ वटा बाल साहित्य र अन्य कविता संग्रह रहेका छन् ।

२०१० साउन २८ गते कास्कीमा जन्मनुभएका हाल गैडाकोट नवलपुर निवासी श्रष्टा गोविन्दराज बिनोदी (गिरी)का ‘शूर्पणखा’ खण्डकाव्यसहित १ दर्जन बढी कृतिहरु प्रकाशित छन् भने लोकतन्त्र, स्वतन्त्रताको पक्षमा समेत गरी १५ सय भन्दा बढी फुटकर रचनाहरु सृजना गरिसक्नुभएको छ ।

२००४ जेठ २२ गते काठमाण्डौमा जन्मनुभएका नेपाली गजलको श्रीवृद्धि र उन्नयनमा अग्रणी श्रष्टा ज्ञानुवाकर पौडेलका ‘खण्डहर नयाँ नयाँ’ गजल संग्रहसहित ५ वटा कृति र सयौ रचनाहरु प्रकाशित भएका छन् ।

सुदुरपश्चिमको साहित्यिक गुलाबको रुपमा समेत परिचित श्रेष्ठ प्रिया पत्थरको जन्म २०२१ साउन ७ गते डोटीमा भएको हो । हाल टिकापुर कैलाली निवासी श्रेष्ठको पतिङ्गर, रंगभुमी लगायत १७ वटा कृति प्रकाशित छन् ।

२०२५ वैशाख १५ गते बझाङमा जन्मिनुभएकी खर्पुनाथ गाउँपालिका हुम्लाकी श्रष्टा वसन्ती कुमारी शाहीको ‘कर्णालीकी बुहारी’ निबन्ध संग्रह, ‘आधा जीवन’ उपन्यास गरी दुई पुस्तक र दर्जनौ रचनाहरु प्रकाशित छन् ।

२०३८ वैशाख ५ गते दाङमा जन्मनुभएकी बर्दिया निवासी श्रष्टा बालिका चौधरीको ‘जीवनका वक्र रेखाहरु’ नामक पुस्तक थारु र नेपाली भाषामा प्रकाशित हुनुका साथै अंग्रेजीमा प्रकाशोन्मुख रहेको छ । चौधरीले थारु भाषामा गीत, कविता लेख्दै आउनुभएको छ भने दर्जनौ लेख रचनाहरु प्रकाशित भएका छन् ।
२०३५ फागुनमा कलैया बारामा जन्मनुभएकी रौतहट निवासी श्रष्टा रेणु गुप्ताको ‘जोगी र चोरी’ (बाल लोककथा संग्रह) प्रकाशित भएको छ । यसका अतिरिक्त गुप्ताले भोजपुरी र बज्जिका भाषामा तीन वटा पुस्तकको अनुवाद गर्नुभएको छ । बज्जिका भाषाको लोक साहित्य क्षेत्रमा योगदानका लागि परिचित गुप्ताका भोजपुरी बज्जिका र नेपाली भाषामा दर्जनौ लघुकथा, कविता र लेखहरु प्रकाशित भएका छन् ।

समाजका तर्फबाट

सुशिल बस्नेत
महासचिव
मानव अधिकार तथा शान्ति समाज
केन्द्रिय कार्यसमिति
मिति ः २०७७ असोज ८

प्रेस विज्ञप्ति
श्रष्टा सम्मान अभियान/थप तीन पुरस्कार स्थापना
मानव अधिकार तथा शान्ति समाजले श्रष्टा सम्मान अभियान अन्तर्गत स्व.पवित्रादेवी चौलागाई मानव अधिकार श्रष्टा सम्मान, चन्द्रकला खनाल अहिंसा श्रष्टा सम्मान र ज्ञानप्रसाद खनाल सहिष्णुता श्रष्टा सम्मान गरि थप तीन वटा पुरस्कार स्थापना गरेको छ । यस अन्तर्गत प्रत्येक बर्ष साहित्यका विभिन्न विधामा योगदान गरेका तीन जना श्रष्टा लाई जनही रु. २० हजार नगदसहित सम्मानपत्र प्रदान गरिने छ । उपरोक्त पुरस्कारहरु स्थापनार्थ अक्षय कोषका लागि स्व. पवित्रादेवी चौलागाईका छोरा मानव अधिकार तथा शान्ति समाजका सल्लाहाकार होमकान्त चौलागाईले रु. २ लाख र चन्द्रकला खनाल तथा ज्ञानप्रसाद खनालका छोरा÷बुहारीहरु मानव अधिकार तथा शान्ति समाजका वरिष्ठ उपसभापति गोविन्द खनाल र राधिका खनाल तथा रुपन्देही शाखा सभापति धनपति खनाल र लक्ष्मी पन्त खनालले रु. ४ लाख शान्ति समाजलाई प्रदान गर्नुभएको छ । यी पुरस्कारहरु हरेक बर्ष महाकवि लक्ष्मी प्रसाद देवकोटा जन्मजयन्तीका अवसरमा यसै वर्ष (२०७७) देखी प्रदान गरिने छ ।
पुरस्कृत ब्यक्तित्व छनौटका लागि शान्ति समाज केन्द्रिय कार्य समितिका सभापति उत्तम पुडासैनीको संयोजकत्वमा सल्लाहकार होमकान्त चौलागाईं, संस्थापक महासचिव सुवास ढकाल, संस्थापक सदस्य कृष्ण कँडेल, बरिष्ठ उपसभापति गोबिन्द खनाल, उपसभापति रेनुका पौडेल र महासचिव सुशिल बस्नेत सम्मिलित छनौट समिति गठन गरिएको छ ।
यससँगै स्रष्टा सम्मान अभियान अन्तर्गत शान्ति समाजद्वारा स्थापित पुरस्कारहरुको संख्या १० पुगेको छ ।
समाजका तर्फबाट

सुशिल बस्नेत
महासचिव, मानव अधिकार तथा शान्ति समाज
केन्द्रिय कार्यसमिति
मिति ः २०७७ असोज २

प्रेस विज्ञप्ति
काठमाण्डौमा ६६ जनाद्धारा रक्तदान
देशैभरि रगतको आपुर्तिमा कमि भइरहेको सन्दर्भमा मानव अधिकार तथा शान्ति समाज, नयाँबस्ती युवा क्लब र गोकर्णेश्वर स्वयंसेवी परिचालन समितिको आयोजनामा २०७७ भदौ १७ गते काठमाण्डौमा रक्तदान कार्यक्रम सम्पन्न भएको छ । विहान ८ बजेदेखी शुरु भएको रक्तदान कार्यक्रममा ६६ जनाले रक्तदान गर्नुभएको थियो ।
भौतिक दुरी कायम गरेर आवश्यक सजगताकासाथ रक्तदानको ब्यवस्था मिलाइएको थियो । शान्ति समाजका केन्द्रिय सभापति उत्तम पुडासैनीले रक्तदान गर्नुहुने सबैलाई धन्यवाद ज्ञापन गर्नुभएको छ ।
समाजका तर्फबाट

सरिता पौडेल
कार्यक्रम अधिकृत
मानव अधिकार तथा शान्ति समाज
मिति : २०७७ भदौ १७ गते

प्रेस विज्ञप्ति
स्वास्थ्यकर्मीहरुमाथि बढ्दो दुव्र्यबहारको विरोधमा शान्ति समाजद्धारा प्रदर्शन
कोरोना सन्त्रास बढ्दै गइरहेको बेला नागरिकको जीवन रक्षाका लागि अग्रपंक्तीमा कार्यरत चिकित्सक तथा स्वास्थ्यकर्मीहरुमाथि देशका विभिन्न भागमा बढ्दै गइरहेको दुव्र्यवहारको विरोध र दोषिमाथि कारबाहीको मागसहित मानव अधिकार तथा शान्ति समाजले २०७७ भदौ ८ गते बिहान काठमाण्डौमा प्रदर्शन गरेको छ ।
स्वास्थ्यकर्मीको सम्मान गरौ, सुरक्षाकर्मीलाई सहयोग गरौ, सञ्चारकर्मीको संरक्षण गरौ, सर्वत्र सद्भाव प्रदर्शन गरौ भन्ने आग्रहसहित काठमाण्डौ जोरपाटीमा सम्पन प्रदर्शनमा समाजका सभापति उत्तम पुडासैनी, सल्लाहकार होमकान्त चौलागाई, काठमाण्डौ शाखा सभापति जगन्नाथ पुडासैनीले संकटको यो घडिमा स्वास्थ्य, सुरक्षा र सञ्चार क्षेत्र ज्यादा संवेदनशील रहेको र उनीहरुको कर्मप्रति मुक्तकण्ठले प्रशंसा गर्दै यस्तो संवेदनशील क्षेत्रमा कार्यरतहरुको सदैव सबैले सम्मान र सहयोग गर्न आग्रह गर्नुभएको थियो । प्रदर्शनमा डेढ दर्जन अधिकारकर्मीहरुको सहभागिता रहेको थियो ।
समाजका तर्फबाट
सरिता पौडेल
कार्यक्रम अधिकृत
मानव अधिकार तथा शान्ति समाज
मिति ः २०७७ भदौ ८ गते

प्रेस विज्ञप्ति
प्रम ओलीको अभिव्यक्ति द्वन्दलाई बढावा दिने नियतले प्रेरित/प्रम पदमा निरन्तरता कति उचित?
प्रधानमन्त्री केपी शर्मा ओलीले असार २९ गते प्रधानमन्त्री निवास वालुवाटारमा आयोजित एक औपचारिक कार्यक्रममा रामायणकालीन अयोध्या र रामका बारेमा दिनुभएको अति विवादास्पद एवं आपत्तिजनक अभिव्यक्तिको मानव अधिकार तथा शान्ति समाज निन्दा गर्दछ । नेपालमा सरकार, राजनीतिक समाज, नागरिक समाज कसैले पनि नउठाएको र कतै नसुनिएको विषयलाई प्रधानमन्त्री पदमा आसिन व्यक्तिले लहडका भरमा अनावश्यक रुपमा व्यक्त गरेका धारणाले उता करोडौ मानिसहरुको आस्था र विश्वासमा चोट पुग्न सक्ने देखिन्छ भने यसैका कारण यता लज्जित हुनुपर्ने अवस्था पैदा भएको छ । प्रधानमन्त्री ओलीको अप्रमाणिक, असान्दर्भिक र अप्रासंगिक सो अभिव्यक्ति छिमेकका नागरिकलाई भड्काउने, शान्ति र सद्भाव खलबल्याउने एवं द्वन्दलाई बढावा दिने नियतले प्रेरित देखिन्छ जुन दुर्भाग्यपूर्ण छ ।
यस्ता अभिव्यक्तिका कारण प्रधानमन्त्री केपी शर्मा ओलीले संयम गुमाएको प्रतित हुँदा केपी शर्मा ओलीको प्रधानमन्त्री पदमा निरन्तरता कति उचित ? यसबारे सम्बन्धीत निकाय विशेषतः सत्तारुढ नेकपा र यसको संसदीय दल÷संसदले बेला छँदै लोकतान्त्रिक तवरले छलफल गरी निष्कर्षमा पुग्नु आवश्यक भएको धारणा मानव अधिकार तथा शान्ति समाजको रहेको छ ।
समाजका तर्फबाट
उत्तम पुडासैनी
सभापति, मानव अधिकार तथा शान्ति समाज
केन्द्रिय कार्यसमिति
मिति : २०७७ असार ३०
समय : दिउँसो १ बजे

प्रेस विज्ञप्ति
युद्ध अपराध हो भन्दै चीनियाँ र भारतीय दुतावास नजिक धर्ना÷वुटवल र दाङमा पनि प्रदर्शन
युद्ध अपराध हो भन्ने स्मरण गराउँदै मानव अधिकार तथा शान्ति समाजले असार ४ गते मध्यान्ह् काठमाण्डौस्थित चीनियाँ र भारतीय दुतावास नजिकै एकसाथ दुई वटा धर्ना प्रदर्शन गरेको छ ।
चीनियाँ र भारतीय सेनाबिच हालै सिमान्त गल्वान उपत्यकामा भएको हिंसात्मक झडपमा दर्जनौ सैनिकहरु हताहत र घाइते भएका थिए । एशियाका दुई भिमकाय मुलुक चीन र भारत शान्तिका लागि उदाहरण बन्नुपर्नेमा युद्धका लागि अग्रसर हुनु अत्यन्त दुखद हुनुका साथै दक्षिण एशिया र विश्व शान्तिकै लागि पनि खतरा भएको भन्दै चीन र भारतलाई सिमान्त क्षेत्रमा झडप रोक्न, वार्ताबाटै समस्याको समाधान खोज्न, आवेग होइन विवेकको प्रदर्शन गर्न, उत्तेजनालाई बढाउने होइन समझदारीलाई विस्तार गर्न र युद्धका कुनै पनि संभावनालाई खारेज गर्न आग्रहसहित प्रदर्शन गरिएको थियो । चीनियाँ दुतावास अगाडि भएको प्रदर्शनमा शान्ति समाजका संस्थापक सभापति कृष्ण पहाडी, संस्थापक सदस्य कृष्ण कँडेल, केन्द्रिय सचिव बलबहादुर गाहा मगर, केन्द्रिय सदस्य नम्रता खरेल, काठमाण्डौ शाखा सभापति जगन्नाथ पुडासैनी, उपसभापति नानीकाजी गिरी, सचिव ईश्वर पुडासैनीसहित दर्जनौ शान्तिवादीहरुको सहभागिता थियो । यसैगरी भारतीय दुतावास नजिक भएको प्रदर्शनमा शान्ति समाजका सभापति उत्तम पुडासैनी, कोषाध्यक्ष रामकृष्ण बराल, केन्द्रिय सदस्य गीता तिमल्सिना, ललितपुर शाखा सभापति चन्द्रमणी बञ्जरासहित दर्जनौ शान्तिवादीहरुको सहभागिता थियो । प्रदर्शनमा सहभागिहरुले Stop war : Promote peace, Yes to Peace, No to War लेखिएका प्लाकार्ड प्रदर्शन गरेका थिए ।
यसैगरी असार ४ गते बिहान चीन र भारतलाई सिमान्त क्षेत्रमा झडप रोक्न आग्रह गर्दै शान्ति समाज रुपन्देही शाखाले वुटवलमा र दाङ शाखाले तुलसीपुरमा प्रदर्शन गरेका थिए । वुटवलको प्रदर्शनमा शान्ति समाजका केन्द्रिय उपसभापति गोविन्द खनाल, केन्द्रिय सदस्य अञ्जु गौतम, रुपन्देही शाखा सभापति डिपी, खनाल, सचिव अर्जुन ज्ञवाली, तुलसीपुरको प्रदर्शनमा केन्द्रिय महासचिव सुशिल बस्नेत, दाङ शाखा सभापति शरद रेग्मी, पूर्व सभापति डिल्ली धिताल, निर्मल नेपालीसहित दर्जनौ शान्तिवादीहरुको सहभागिता रहेको थियो । स्मरणीय छ, युद्ध निषेध ः शान्ति विशेष भन्ने मूल नारासहित मानव अधिकार तथा शान्ति समाजले विशेष अभियान सञ्चालन गर्दै आइरहेको छ ।
समाजका तर्फबाट
सरिता पौडेल
कार्यक्रम अधिकृत
मानव अधिकार तथा शान्ति समाज
मिति : २०७७ असार ४ गते

नागरिक प्रतिवेदन सार्वजनिक
रुकुम पश्चिम चौरजहारी सोतीमा घटेको घटनाबारे मानव अधिकार तथा शान्ति समाजको नेतृत्वमा अधिकारकर्मी तथा सञ्चारकर्मीहरुले गरेको स्थलगत अध्ययन अनुगमन पश्चात नागरिक प्रतिवेदन जेठ ३० गते वुटवलमा एक कार्यक्रम गरी सार्वजनिक गरिएको छ । स्थलगत अध्ययन अनुगमनमा संविधानसभा सदस्य एवं राष्ट्रिय दलित पत्रकार संघ नेपालका केन्द्रिय अध्यक्ष विनोद पहाडी, मानव अधिकार तथा शान्ति समाजका केन्द्रीय बरिष्ठ उपसभापति गोविन्द खनाल, बरिष्ठ पत्रकार तथा अधिवक्ता बालकृष्ण चापागाई अधिवक्ता शिव गौडेल, पत्रकारद्वय माधव नेपाल र विनोद परियार संलग्न हुनुहुन्थ्यो ।

वातावरण दिवसमा विभिन्न जिल्लामा वृक्षारोपण र सरसफाई कार्यक्रम
मानव अधिकार तथा शान्ति समाज बाँके शाखाद्वारा ५ जुन अर्थात विश्व वातावरण दिवसका अवसरमा २०७७ जेठ २३ गते बिहान बाँकेस्थित हिन्दू समसान भूमिमा नीम, पिपल, सिसम, तुलसी, मसला, सागोन, अमला, जामुन लगायत विरुवा रोपिएको छ ।
यस्तै शान्ति समाज रुपन्देही शाखाको आयोजनामा विश्व वातावरण दिवसका दिन बिहान बुटवलको ग्लोबल पिस पार्कमा वृक्षारोपण कार्यक्रम सम्पन्न भएको छ ।
यसैगरी शान्ति समाज दाङ शाखाले रक्त सञ्चार केन्द्र तुलसीपुर र राप्ती प्रादेशिक अस्पतालको हाता बाहिर झाडी सरसफाई गरेको छ भने शान्ति समाज काठमाडौं शाखाले जेठ २३ गते काठमाडौंको जोरपाटीस्थित कपुर बाटिकामा सरसफाई गरेको छ ।
स्थापना कालदेखी नै वातावरण संरक्षणका लागि आवाज उठाउँदै आएको मानव अधिकार तथा शान्ति समाजले विगत १४ वर्षदेखि जलबायु परिवर्तन र विश्वव्यापी उष्णता र त्यसबाट परेको प्रभावबारे सचेतना अभियान सञ्चालन गर्दै आएको छ ।

शान्ति समाज स्थापनाको २५ वर्ष/६ जिल्लामा प्रदर्शन
मानव अधिकार, शान्ति, लोकतन्त्र र अहिंसाका लागि क्रियाशील स्वयंसेवी संस्था मानव अधिकार तथा शान्ति समाज २५ वर्षमा प्रवेश गरेको छ ।
२०५३ जेठ १९ गते स्थापित शान्ति समाजले स्थापना दिवसका सन्दर्भमा जेठ १९ गते बिहान काठमाण्डौ, रुपन्देही र दाङमा प्रदर्शन गरेको छ । कार्यक्रमका दौरान रुकुम पश्चिम घटनाको सत्य तथ्य छानविनका लागि संसदिय समिति गठन गर, दोषीमाथि कानुनसम्मत कारबाही गर, पिडितलाई न्याय ः पिडकलाई सजाय, समतामुलक समाज निर्माण गरौँ, जातीय विभेद अन्त्य गरौँ, शान्ति समाजको स्थापना ः सामाजिक न्यायका लागि लगायतका प्लेकाड प्रदर्शन गरिएको थियो ।
शान्ति समाज काठमाण्डौ शाखाद्वारा काठमाण्डौको जोरपाटीमा आयोजित प्रदर्शनमा बोल्दै शान्ति समाजका केन्द्रिय सभापति उत्तम पुडासैनीले साढे दुई दशक देखी शान्ति, न्याय र स्वतन्त्रताका पक्षमा शान्ति समाज क्रियाशील रहेको चर्चा गर्दै अभियानमा साथ दिने र सहयोग गर्ने सबैप्रति आभार व्यक्त गर्नुभयो । संकटका बेला झनै सक्रिय हुने गरेको शान्ति समाजका विरुद्ध मानव अधिकारकै आवरणमा घृणा र विखण्डनको वकालत गर्ने केही व्यक्ति र संस्था भने सक्रिय देखिएको भन्दै सभापति पुडासैनीले राष्ट्रिय स्वाभिमानका पक्षमा शान्ति समाजको अभियान निरन्तर रहने बताउनुभयो । गोकर्णेश्वर नगरपालिकाका मेयर सन्तोष चालिसेले नेपालको लोकतान्त्रिक आन्दोलनमा शान्ति समाजले निर्वाह गरेको विशिष्ट भुमिकाको चर्चा गर्नुभएको थियो । कार्यक्रममा शान्ति समाजका सल्लाहकार होमकान्त चौलागाई, गोकर्णेश्वर वडा न. ५ का वडाध्यक्ष नारायण सुवेदी, शान्ति समाजका कोषाध्यक्ष रामकृष्ण बराल, पुर्व महासचिव कुमारराज सुवेदी, काठमाण्डौँ शाखा सभापति जगन्नाथ पुडासैनीले मन्तव्य व्यक्त गर्नुभएको थियो ।
यसैगरी शान्ति समाज रुपन्देही शाखाद्वारा रुपन्देही सैनामैना नगरपालिकास्थित मुर्गियामा आयोजित प्रदर्शनमा बोल्दै वरिष्ठ उपसभापति गोविन्द खनालले रुकुम पश्चिम घटनामा पिडितलाई न्याय र पिडकलाई सजाय नभएसम्म अभियान निरन्तर रहने बताउनुभयो । कार्यक्रममा संविधानसभा सदस्य विनोद पहाडी, शान्ति समाज केन्द्रिय सदस्य कृष्ण पंगेनी, विभागीय संयोजक लालहरी पाण्डे, रुपन्देही शाखा सभापति धनपति खनाल, अर्जुन ज्ञवाली, वडा न. ३ का वडाध्यक्ष रत्न बहादुर पाण्डे, नागरिक अभियन्ता नर बहादुर सुनार, नेपाल सिलाई संघका सुवास परियारले मन्तव्य व्यक्त गर्नुभएको थियो ।
शान्ति समाज दाङ शाखाद्वारा तुलसीपुरमा आयोजित कार्यक्रममा बोल्दै शान्ति समाजका महासचिव सुशिल बस्नेतले रुकुम पश्चिम घटनामा सत्तारुढ नेकपाका केही प्रभावशाली नेताहरुले समाजलाई गुमराह गर्ने गरी खेलेको न्याय विरोधी भूमिकाप्रति आपत्ति व्यक्त गर्नुभयो । कार्यक्रममा नागरिक अभियन्ताहरु छवि परियार, शरद रेग्मी, डिल्लीराज धिताल, निर्मल नेपाली, उषा गौतम लगायत दर्जन बढी वक्ताहरुले शान्ति र सामाजिक न्यायका बारेमा प्रकाश पार्नुभएको थियो ।
शान्ति समाजको २५ औँ स्थापना दिवसका सन्दर्भमा सामाजिक न्यायका विषयमा केन्द्रित रहि विभिन्न जिल्लामा प्रदर्शन हुन गइरहेको छ ।
यसैगरी रुकुम पश्चिम चौरजहारीमा घटेको घटनाका सन्दर्भमा पिडितलाई न्याय ः पिडकलाई सजाय भन्ने आग्रहसहित जेठ १८ गते मानव अधिकार तथा शान्ति समाज मोरङ शाखाको आयोजनामा विराटनगरमा, कपिलबस्तु शाखाको आयोजनामा जितपुर ४ कपिलबस्तुमा र कैलाली शाखाको आयोजनामा टिकापुरमा विरोध प्रदर्शन गरिएको थियो |