प्रेस विज्ञप्ति

जलवायु न्याय हाम्रो अधिकार भन्ने आह्वानसहित शान्ति दिवस मनाइने

मानव अधिकार तथा शान्ति समाजले “शान्तिका लागि सद्भाव: जलवायु न्याय हाम्रो अधिकार” भन्ने आह्वानसहित ४५ औँ अन्तर्राष्ट्रिय शान्ति दिवस (२१ सेप्टेम्बर) मनाउने भएको छ । यस क्रममा २०८३ असोज ५ गते विभिन्न जिल्लामा प्रदर्शन, संवाद लगायतका कार्यक्रम आयोजना हुने छ । 

स्मरणीय छ, शान्ति समाजले विगत दुई दशकदेखि जलवायु न्याय केन्द्रित अभियान सञ्चालन गर्दै आएको छ भने हरित गृह ग्यास उत्सर्जनमा विश्वको पहिलो र तेस्रो नम्वरमा रहेका चीन र भारतको कारण हिमालय प्रभावित भएको हुँदा ती देशहरूबाट क्षतिपूर्ति उपलब्ध गराउन नेपालले अभियान अगाडि बढाउनुपर्छ भन्ने धारणासहित हिमालय बचाउ नदी जोगाउ अभियान समेत सञ्चालन गर्दै आएको छ । यसैगरी शान्ति समाजले हिमालय संरक्षणका विषयमा केन्द्रित रही चीन र भारतसँग सहकार्यमा निरन्तर जोड दिँदै आएको छ । 

२०६४ सालमा “जलवायु परिवर्तनका कारण विस्थापित/शरणार्थी हुनसक्ने सम्भावना र त्यसका कारण, मात्रा (सङ्ख्या) आदिबारे समयमै पहिचान गरी सम्भावित प्राकृतिक विपत्तिको सामना तथा व्यवस्थापन गर्न राज्य गम्भीर भई त्यस्तो बेला उद्धार, राहत र पुनर्वासका लागि आवश्यक जनशक्तिसहितको बलियो र स्थायी संयन्त्र र पूर्वाधार खडा गर्नुपर्छ । ” भन्दै शान्ति समाजले देशव्यापी रूपमा अभियान थालेको थियो जुन निरन्तर छ । स्मरणीय छ, शान्ति समाजले संविधानको प्रस्तावनामानै “जीवनचक्र परिस्थिति सन्तुलन” समावेश गर्न आह्वानसहित अभियान सञ्चालन गर्दै आएको छ । 

समाजका तर्फबाट

रेनुका पौडेल

सभापति, मानव अधिकार तथा शान्ति समाज

२२ भदौ २०८३

प्रेस विज्ञप्ति

प्रेसमा प्रहरीको छापा निन्दनीय

वरिष्ठ पत्रकार किशोर श्रेष्ठलाई २०८३ साउन २७ गते राति प्रहरीले वैयक्तिक गोपनीयतासम्बन्धी कसुरमा गिरफ्तार गरेको बारे मानव अधिकार तथा शान्ति समाजको ध्यानाकर्षण भएको छ। प्रेसबाट कुनै त्रुटि  भए नियामक निकायहरू मार्फत निरूपणको विधि छदा छदै पत्रकारको गिरफ्तारी आपत्तिजनक छ।  यसै गरी सो गिरफ्तारी पश्चात्  साउन २८ गते बिहान पत्रकार श्रेष्ठ सम्पादक रहेको जनआस्था पत्रिकाको कार्यालयमा प्रहरीले छापा मारेर कम्प्युटर सहित विभिन्न सामग्री नियन्त्रणमा लिनु निन्दनीय छ, दुराशय युक्त देखिन्छ, जुन प्रेस स्वतन्त्रता, मौलिक हक र नेपालको संविधानको उल्लङ्घन  हो । तसर्थ शान्ति समाज पत्रकार श्रेष्ठको शीघ्र रिहाइ र प्रेस माथिको आक्रमण बन्द गर्न सरकारलाई आग्रह गर्दछ।

स्मरणीय छ एकातिर नेपालको संविधानको प्रस्तावना मानै पूर्ण प्रेस स्वतन्त्रता सुनिश्चित गरिएको छ भने  संविधानको धारा १९ मा मौलिक हक अन्तर्गत सञ्चारको हक प्रत्याभूत गरिएको छ । जसको उपधारा २ मा सञ्चार माध्यमलाई बन्द, जफत वा दर्ता खारेज वा त्यस्तो सामग्रीजफत गरिने छैन भन्ने सुनिस्चित गरिएको छ। यसै गरी नेपाल राज्य पक्ष रहेको नागरिक तथा राजनीतिक अधिकार सम्बन्धी अन्तर्राष्ट्रिय प्रतिज्ञा पत्रको धारा १९ स्मरणीय छ भने पत्रकारहरूको सुरक्षाको लागि सूचनाको श्रोत खुलाउन सञ्चार जगत् बाध्य नभएको पत्रकारिताको विशेष प्रिभिलेज सम्बन्धी अन्तर्राष्ट्रिय मान्यता सबैले अवलम्बन गर्नुपर्छ ।

रेनुका पौडेल

सभापति

मानव अधिकार तथा शान्ति समाज

२८ साउन २०८३ 

प्रेस विज्ञप्ति 
तोड्न होइन, जोडन योगदान गर्न आग्रह 
“हाम्रो जीवन धाराः अहिंसा, शान्ति, सद्भाव, सहिष्णुता र भाइचारा, तोड्न होइन जोडनका लागि योगदान गरौँ, संवाद, सहमति, सहकार्यको मार्ग अवलम्बन गरौँ” भन्ने आह्वानसहित मानव अधिकार तथा शान्ति समाजले माइतीघर काठमाण्डौमा आधा घण्टा प्रदर्शन गरेको छ ।  २०८३ साउन १८ गते सोमबार दिउँसो भएको  प्रदर्शनमा सहभागीहरूले हिंसा र घृणालाई खारेज गरौँ, तोड्न होइन जोडन योगदान गरौँ, पीडितलाई न्याय र दोषीलाई सजाय सुनिश्चित गर भन्ने प्लेकार्ड बोकेका थिए ।
प्रदर्शनमा शान्ति समाजका संस्थापक सभापति, सभापति, पूर्व सभापतिहरू, केन्द्रीय समितिका पदाधिकारीहरूसहित ३ दर्जन शान्तिवादीहरूको सहभागिता थियो । 
सद्भाव र सहिष्णुता प्रवद्र्धनका लागि शान्ति समाजले सुरु गरेको सद्भाव एकता अभियान अन्तर्गत पाल्पा सल्यान र सुर्खेतमा सद्भाव एकता र्‍याली सम्पन्न भईसकेको छ । 
समाजका तर्फबाट
सरिता पौडेल
उपनिर्देशक, मानव अधिकार तथा शान्ति समाज
१८ साउन २०८३

प्रेस विज्ञप्ति
न्यायिक छानबिन आयोग गठन गर, सद्भाव, सहिष्णुता र भाइचारा प्रवद्र्धन गर
२०८३ साउन १० गते राती सुनसरी जिल्लाको देवानगञ्ज गाउँपालिका वडा न . ३  कप्तानगन्जमा  फरक समुदायबीच भएको विवादका सन्दर्भमा सुरक्षाकर्मीले गोली चलाउँदा १ जनाको मृत्यु भएको र झन्डै  दुई दर्जन घाइते भएको घटनाले मानव अधिकार तथा शान्ति समाज स्तब्ध  एवं मर्माहत भएको छ । सोही स्थानमा केही साता अगाडी उत्पन्न विवाद निरूपण हुन नसकेको पृष्ठभूमिमा सो घटना घटेको देखिन्छ । शान्ति समाजका सुनसरीस्थित सदस्यहरूबाट प्राप्त विवरण अनुसार मध्यरातमा स्थिति नियन्त्रणका लागि विभिन्न उपायहरू अवलम्बन गर्ने विकल्प छँदाछँदै आवेगमा आएर सुरक्षाकर्मीले  अन्धाधुन्ध गोली चलाएको  देखिन्छ  । राज्य, सरकारको प्रमुख दायित्व नागरिकको जीवन रक्षा गर्नु हो । नागरिक कै  जीवन हरण हुने गरी भएको यो गोली काण्डको शान्ति समाज निन्दा गर्दछ र घटनाको स्वतन्त्र एवं निष्पक्ष छानबिनका लागि शीघ्र उच्च स्तरीय न्यायिक छानबिन आयोग गठन गर्न पुन आग्रह गर्दछ । यसैगरी दोषीलाई कारबाही, पीडितलाई न्याय  र घाइतेहरूको उपचार लगायत राहतको व्यवस्था सुनिश्चित गर्नु पर्दछ ।
शान्ति समाजले समुदायबीच सुमधुर सम्बन्ध, सद्भाव प्रवद्र्धनका लागि सदैव व्यापक साझेदारी र सहकार्यमा जोड दिँदै आएको छ । देशमा कुनै पनि समूह, समुदायले अन्याय, असुरक्षा अनुभूत गर्नु नपरोस्, अहिंसा, शान्ति, सद्भाव र सहिष्णुता  सदैव जीवन धारा बनोस् भन्नका  खातिर  सबै क्षेत्रबाट  इमानदार पहल र योगदान अहिलेको आवश्यकता हो । तसर्थ बलको अत्यधिक प्रयोग वाट  समस्या समाधान हुन्छ भन्ने आत्मघाती एवं रुखो  व्यवहार त्यागेर संवाद, सहमति र सहकार्यको मार्ग अवलम्बन गर्न सरकार लाई  शान्ति समाज आग्रह गर्दछ । यसैगरी घरमा आगो लागेको  वेला त्यस्तो आगो निभाउन परिवारका सबै सदस्यको कर्तव्य भएकोले सद्भाव, सहिष्णुता  र भाइचारा प्रवद्र्धनका लागि आ आफ्नो क्षेत्रबाट विशेष योगदान गर्न राजनीतिक  समाज, नागरिक समाज, सञ्चार जगत् सबै नागरिकलाई  शान्ति समाज  आह्वान  गर्दछ ।  

 समाजका तर्फबाट
 रेनुका पौडेल
सभापति, मानव अधिकार तथा शान्ति समाज, केन्द्रीय कार्यसमिति
१३ साउन २०८३