प्रेस विज्ञप्ति
संक्रमणकालीन न्याय प्रक्रिया टुङ्गोमा नपुग्नु दुखद्, २० जिल्लामा प्रदर्शन
संक्रमणकालीन न्याय प्रक्रिया राजनीतिक लेनदेनको विषय बनाउन खोजिएकोप्रति चिन्ता व्यक्त गर्दै मानव अधिकार तथा शान्ति समाजले विभिन्न जिल्लामा प्रदर्शन गरेको छ । विस्तृत शान्ति सम्झौता सम्पन्न भएको १८ वर्ष पुग्न लाग्दा पनि संक्रमणकालीन न्याय प्रक्रिया टुङ्गोमा नपुग्नु दुखद रहेको छ । यसै सन्दर्भमा पिडितलाई न्याय र पिडकलाई सजाय सुनिश्चित गर, संक्रमणकालीन न्याय सम्बन्धी संसोधन विधेयकलाई पहिले मानव अधिकारमैत्री बनाउ र सोही अनुरुप मात्र प्रक्रिया अगाडि बढाउ, मानव अधिकारको गम्भीर उल्लंघन र मानवता विरुद्धको अपराधमा संलग्नहरुलाई दण्ड सुनिश्चित गर, संक्रमणकालीन न्यायलाई राजनीतिक लेनदेनको विषय बनाउन पाइदैँन भन्दै २०८० चैत १७ गते शान्ति समाजका काठमाण्डौ, रुपन्देही, पाल्पा, दाङ, चितवन, सुर्खेत, ललितपुर, महोत्तरी, गुल्मी, संखुवासभा, नवलपुर, बागलुङ, तेह्रथुम, म्याग्दी, बाँके, सल्यान, बारा, कपिलवस्तु, दैलेख, कैलाली शाखाले प्रदर्शन गरेका हुन । प्रदर्शनमा सहभागिहरुले द्वन्दकालिन मानव अधिकार गम्भीर उल्लंघनका दोषीलाई कारवाही गर, द्वन्दकालमा भएका मानवता विरुद्धको अपराधमा संलग्नहरुलाई कारवाही गर लेखिएका प्लेकार्डहरु प्रदर्शन गरेका थिए ।
मानव अधिकार तथा शान्ति समाजले हरेक वर्ष चैत १७ गते हिंसाको खारेजी र दण्डहीनताको अन्त्यमा जोड दिँदै कार्यक्रम गर्दै आएको छ ।
समाजका तर्फबाट

सरिता पौडेल
उपनिर्देशक, मानव अधिकार तथा शान्ति समाज
१७ चैत २०८०

प्रेस विज्ञप्ति
सुन र सहकारी प्रकरणः सौदावाजीको घिनलाग्दो राजनीतिको निन्दा

विवाद हल गर्ने थलोका रुपमा समेत रहेको सार्वभौम संसद सामान्यतया कसैले पनि अवरुद्ध गर्नु हुदैँन भन्ने धारणा मानव अधिकार तथा शान्ति समाजको रहेको छ । लोकतन्त्रको प्राण भनेकै सुशासन हो । सुशासनका लागि ठोस संकल्प भनेको दागी सांसदहरुलाई पदिय जिम्मेवारिबाट मुक्त गर्नु हो ।
बहुचर्चित सहकारी घोटाला प्रकरणमा उपप्रधान एवं गृहमन्त्री रवि लामिछानेको संलग्नताका तथ्यहरु सार्वजनिक भइसकेको सन्दर्भमा शिघ्र निष्पक्ष एवं प्रभावकारी छानविन अघि बढाउन शान्ति समाज आग्रह गर्दछ । नैतिक रुपमा रवि लामिछाने स्वयंले मार्ग प्रशस्त गर्नुपर्दछ ।
केही भ्रष्टाचार÷घोटाला प्रकरणमा अनुसन्धान भएता पनि सौदाबाजीका कारण मूल दोषीहरुले उन्मुक्ति पाउँदै आएको देखिन्छ । सत्तारुढ नेकपा माओवादी केन्द्रका माथिल्लो तहका नेताहरु संलग्न सुन काण्ड त्यसको पछिल्लो उदाहरण हो जसमा उपप्रधान एवं गुहमन्त्री रवि लामिछानेले आफुतिर सोझिएको सहकारी प्रकरणबाट उन्मुक्ति पाउन सौदावाजी गरेको धारणा शान्ति समाजको छ ।
यसैगरी नेपाली कांग्रेसको नेतृत्वको नियत पनि आफ्नो परिवारका सदस्य (समानुपातिक तर्फबाट सांसद समेत)माथि कुनै पनि प्रकारको छानविन नहोस भन्ने सौदावाजीको रणनीतिले प्रेरित भएको घटनाक्रमले देखाउँछ ।
सुशासन र सदाचार विपरित विभिन्न घोटालाका मूल दोषीहरुलाई उन्मुक्ति दिने गरी हुर्किरहेको सौदावाजीको घिनलाग्दो राजनीतिको शान्ति समाज निन्दा गर्दछ ।

समाजका तर्फबाट

रामकृष्ण बराल
सभापति, मानव अधिकार तथा शान्ति समाज
केन्द्रिय कार्यसमिति
मिति ः २०८० चैत १२

प्रेस विज्ञप्ति
सर्वसत्तावादी सोच आधारभूत स्वतन्त्रताका लागि खतरा

२०८० चैत ६ गते गृह मन्त्रालयबाट प्रमुख जिल्ला अधिकारीहरुलाई पठाइएको निर्देशनसहितको परिपत्रप्रति मानव अधिकार तथा शान्ति समाजको ध्यानाकर्षण भएको छ । उक्त परिपत्रको बुँदा १ को १.३ र बुँदा नम्बर २ को २.१ मा उल्लेखित निर्देशन आधारभूत स्वतन्त्रता विशेषतः अभिव्यक्ति स्वतन्त्रताको वर्खिलाफ भएको तथ्य स्वयं गृह मन्त्रालयले स्विकार गरेको छ र चैत्र ८ गते गृह मन्त्रालयद्वारा जारी विज्ञप्तिमा आम सञ्चारकर्मी तथा संवद्ध पक्षले व्यक्त गरेको चासोलाई मध्यनजर गर्दैै सो परिपत्रमा उल्लेख भएका ति दुई वटा बुँदाहरु हटाई पुन परिपत्र गरेको जनाएको छ ।
मन्त्रालय स्वयंले त्रुटी स्विकार गरि सच्याउनु सकारात्मक पक्ष हो तर संविधानको प्रस्तावनामा नै लिपिवद्ध पूर्ण प्रेस स्वतन्त्रताप्रति घात गर्दै गृह मन्त्रालयले स्वतन्त्रता विरोधी प्रावधानसहितको परिपत्र किन जारी गर्यो? यसको जबाफ दिन शान्ति समाज उपप्रधान एवं गृहमन्त्री रबी लामिछानेलाई आग्रह गर्दछ । आधारभूत स्वतन्त्रता र मानव अधिकार विरोधी कुनै पनि सरकारी चिन्तन र निर्देशनको शान्ति समाज विरोध गर्दछ र यस्ता सर्वसत्तावादी सोच लोकतान्त्रिक संस्कार एवं मूल्य विपरित भएको स्मरण गराउँछ ।
स्मरणीय छ, चैत ६ गते गृह मन्त्रालयले जारी गरेको परिपत्रमा अनलाइन न्युज पोर्टल, फेसबुक र ट्वीटर लगायतका सामाजिक सञ्जाल र छापा माध्यमबाट प्रशारण गरिने कतिपय समाचार÷अभिव्यक्तिका सन्दर्भमा त्यस्ता कार्यहरु नियन्त्रण गरि दोषीलाई कारवाही गर्न जिल्ला प्रहरी कार्यालय र जिल्ला प्रशासन कार्यालयमा एक एक जना अधिकृत स्तरको कर्मचारी खटाई डेस्क सञ्चालन गर्ने, कानूनी कारवाही गरि सो को सार्वजनिकरण गर्ने उल्लेख थियो ।
कानूनलेनै निषेध गरेका सामग्री सम्प्रेषण गर्नेहरुलाई कानून सम्मत कारवाही गर्न विभिन्न निकायहरु अस्तित्वमा रहेको सरकारलाई स्मरण गराउँदै सर्वसत्तावादी सोचबाट मुक्त हुन शान्ति समाज आग्रह गर्दछ ।
मानव अधिकार तथा शान्ति समाज प्रेस स्वतन्त्रताको संरक्षणका लागि क्रियाशील संस्था हो र सदैव अभिव्यक्ति स्वतन्त्रताको पक्षमा वकालत गर्दै आएको छ तर घृणात्मक अभिव्यक्ति भने अभिव्यक्ति स्वतन्त्रता नभएर अपराध भएको धारणा शान्ति समाजले विगतमा पनि स्पष्ट गर्दै आएको छ ।
समाजका तर्फबाट

रेनुका पौडेल
महासचिव, मानव अधिकार तथा शान्ति समाज, केन्द्रीय कार्यसमिति
९ चैत २०८०

प्रेस विज्ञप्ति
सभ्यता र संविधान विपरित छुवाछुत र जातीय भेदभाव कहिलेसम्म?
जातीय विभेद उन्मुलनका लागि अन्तर्राष्ट्रिय दिवस २१ मार्चका सन्दर्भमा सामाजिक न्यायका लागि क्रियाशील मानव अधिकार तथा शान्ति समाजले छुवाछुत, भेदभावका घटनामा संलग्नहरुलाई दण्डीत गर्न जोड दिँदै विभिन्न जिल्लामा प्रदर्शन गरेको छ । “सभ्यता र संविधान विपरित छुवाछुत र जातीय भेदभाव कहिलेसम्म?” भन्दै २०८० चैत ८ गते बिहान शान्ति समाजका काठमाण्डौ शाखाले जोरपाटीमा, चितवन शाखाले भरतपुरमा प्रदर्शन गरेका छन् । यसैगरी सुर्खेत शाखाले वीरेन्द्रनगरमा अन्तरक्रिया कार्यक्रम सम्पन्न गरेको छ । यस्तै पाल्पा, दाङ, नवलपुर लगायत शाखाहरुले विभिन्न कार्यक्रम आयोजना गर्दैछन् ।
सन् १९६० को मार्च २१ का दिन दक्षिण अफ्रिकाको सार्पभिलमा रंगभेदी कानून विरुद्ध आयोजित शान्तिपूर्ण प्रदर्शनमा प्रहरीले गोली चलाउँदा ६९ जनाको मृत्यु भएको थियो । सो बर्बरताको विरोध र त्रासदीको स्मरण गर्दै यो दिवस विश्वव्यापी रुपमा मनाउने गरिएको छ भने सन् १९६६ मा राष्ट्रसंघ महासभाले सबै प्रकारका जातीय विभेद अन्त्यका लागि आफ्नो प्रयास दोब्बर गर्न आह्वान गरेको थियो ।
यसैगरी शान्ति समाजले काभ्रे जिल्ला चौंरिदेउराली गाउँपालिकास्थित बच्छेस्वरि प्राथमिक विद्यालयका विद्यार्थीहरुलाई रु ४५ हजारको सहयोग (स्टेसनरी सामग्री) गरेको छ । शान्ति समाजका सभापति रामकृष्ण बराल, कोषाध्यक्ष किरण ढकाल, पूर्व कोषाध्यक्ष बटुकृष्ण ढुंगेलसहितले २०८० चैत ७ गते उक्त विद्यालयमा आयोजित कार्यक्रममा सहयोग हस्तान्तरण गर्नुभएको थियो ।
समाजका तर्फबाट

सरिता पौडेल
उपनिर्देशक, मानव अधिकार तथा शान्ति समाज
८ चैत २०८०, मध्यान्ह् १२ बजे

प्रेस विज्ञप्ति
डा. विष्णुमाया परियारलाई बद्री पहाडी समाजसेवा पुरस्कार

मानव अधिकार एवं सामाजिक न्यायका लागि विशिष्ट योगदान हेतु अधिकारकर्मी डा. विष्णुमाया परियारलाई वर्ष २०८० को ‘कर्मयोगी बद्री पहाडी समाजसेवा पुरस्कार‘ प्रदान गर्ने निर्णय मानव अधिकार तथा शान्ति समाजले गरेको छ । प्रत्येक वर्ष प्रदान गरिने रु. १ लाख १० हजार राशीको यो पुरस्कार अन्तर्राष्ट्रिय क्षेत्रमा समेत सुपरिचित डा. परियारलाई प्रदान गर्ने निर्णय २०८० फागुन ३० गते सम्पन्न शान्ति समाजको पुरस्कार छनौट समितिले गरेको हो । साढे दुई दशक भन्दा बढी अधिकारको आन्दोलनमा योगदानका लागि राष्ट्रिय एवं अन्तर्राष्ट्रिय स्तरमा सम्मानित सामाजिक न्यायका लागि क्रियाशील अभियन्ता डा. विष्णुमाया परियारले विभिन्न विश्वविद्यालय तथा प्रतिष्ठानहरुमा अतिथि वक्ताको रुपमा मन्तव्य व्यक्त गर्दै आउनुभएको छ ।
सन् १९७३ को डिसेम्वर १९ मा गोरखामा जन्मनुभएकी डा. परियारको जीवनकथा अमेरिकाको म्यासाच्युसेटस राज्यको शिक्षा विभागद्वारा कक्षा ७ को पाठ्यक्रममा समेत संलग्न छ । यसैगरी उहाँको जीवन संघर्षको गाथा विश्व चर्चित एक प्रकाशनगृहद्वारा प्रकाशित पुस्तकमा समेत समावेश छ ।
अधिकारका क्षेत्रमा क्रियाशील संस्था एसोसिएसन फर दलित वुमन्स एड्भान्समेट अफ नेपाल (एड्वान)का संस्थापक अध्यक्ष डा.परियारले अमेरिकाको क्लार्क विश्वविद्यालयबाट स्नातकोत्तर गर्नुभएको छ भने पाइन म्यानर कलेजले सन् २०१३ मा मानार्थ डि.लिट (डक्टर अफ लेटरस्) ले सम्मान गरेको थियो । हाल अमेरिकामा रहनुभएकी डा. परियारका दुई वटा कृति प्रकाशित छन् ।

समाजका तर्फबाट

रामकृष्ण बराल
सभापति, मानव अधिकार तथा शान्ति समाज
केन्द्रिय कार्यसमिति
मिति : २०८० चैत १

प्रेस विज्ञप्ति
महिलामाथि हुने हिंसा र यौन दुव्र्यवहार विरुद्ध केन्द्रीत रहि काव्य प्रवाह सम्पन्न
नेपालमा यस वर्ष पनि महिलामाथि हिंसा र यौन दुव्र्यवहारका दर्जनौ घटनाहरु प्रकाशमा आएका छन् । त्यस्ता घटनामा संलग्नहरुलाई कानूनी कारबाही गर्नुको साटो दबाउने र दोषीलाई उन्मुक्ति दिने कार्यले त्यस्ता घटनामा बढोत्तरी भइरहेको देखिन्छ ।
महिलामाथि हुने हिंसा र यौन दुव्र्यवहार विरुद्ध केन्द्रीत रहि २०८० फागुन २४ गते काठमाण्डौमा शान्ति काव्य प्रवाह सम्पन्न भएको छ । अन्तर्राष्ट्रिय नारी दिवसको सन्ध्यामा मानव अधिकार तथा शान्ति समाजद्वारा आयोजित काव्य प्रवाहको ९४ औँ श्रृंखलामा स्रष्टाहरुले महिलाहरुको मानव अधिकारका पक्षमा रचना प्रस्तुत गर्नुभएको थियो ।
मानव अधिकार तथा शान्ति समाजका सभापति रामकृष्ण बरालको सभापतित्व र महासचिव रेनुका पौडेलको सञ्चालनमा सम्पन्न शान्ति काव्य प्रवाहमा मेनका पोखरेल आचार्य, ऋचा, शान्ति शर्मा, प्रीति कौर, ललिता दोषी, सरला तिमल्सीना, सुशीला खड्का हसिना, रश्मि रिमाल, रत्ननिधि रेग्मी शुक्राचार्य, भाग्यशाली अधिकारी, विजयध्वज थापा, भुवन शिवाकोटी, विजयराज न्यौपाने, रविन्द्र आशिष शैली, डिल्लीप्रसाद मुलतिहुन, गगनदीप सर्व, जनार्दन अधिकारी, निर्मल पराजुली, अच्युतप्रसाद पौडेल, जगदीश्वर पोखरेलसहित २० जना स्रष्टाहरुले आफ्नो रचना प्रस्तुत गर्नुभएको थियो ।
समाजका तर्फबाट

सरिता पौडेल
उपनिर्देशक, मानव अधिकार तथा शान्ति समाज
२४ फागुन २०८०

प्रेस विज्ञप्ति
रुस युक्रेन युद्धको दुई वर्षः युद्ध तत्काल अन्त्य गर्न आह्वानसहित विभिन्न जिल्लामा प्रदर्शन

सन् २०२२ को फेव्रुवरी २४ मा रुसले युक्रेनमाथि आक्रमण गरेपश्चात शुरु भएको रुस युक्रेन युद्ध दुई वर्ष पुगेको छ । कहालिलाग्दो युद्ध तत्काल अन्त्य गर्न रुसलाई पुन आग्रह गर्दै २३ फेव्रुवरी अर्थात २०८० फागुन ११ गते मानव अधिकार तथा शान्ति समाजका जिल्ला शाखाहरुले काठमाण्डौ, दाङ, संखुवासभा, चितवन, इलाम र ललितपुर जिल्लामा प्रदर्शन गरेका छन् ।
यसैगरी मानवीय युद्धविराम घोषणा गरि तत्काल युद्ध रोक्न इजरायललाई आग्रह गरिएको छ । प्रदर्शनमा रुस अति भयोः युद्ध तत्काल अन्त्य गर, युक्रेनमाथि आक्रमण बन्द गर, रुसः युद्ध रोक, शान्ति रोज, रुसी सेनामा नेपालीलाई भर्ती गर्ने र युद्धमा प्रयोग गर्ने कार्य बन्द गर, रुस–युक्रेन युद्धको दुई वर्षः उपलब्धि ध्वंस र विनास मात्र, इजरायलः तत्काल युद्धविराम गर, इजरायलः मानवता विरुद्धको अपराध बन्द गर, हमासः आतंकवाद बन्द गर, हमासः विपिन जोशी लगायत बन्धक बनाएका सबैलाई विना सर्त रिहा गर, इजरायल–हमास युद्धको १२८ दिनः सभ्यता लज्जित, मानवता पराजित लेखिएका प्लेकार्ड प्रदर्शन गरिएको थियो ।
यस्तै शान्ति समाजका अन्य जिल्ला शाखाहरुले पनि फागुन ११ गते साँझ प्रदर्शन गर्दैछन् ।
स्मरणीय छ, मानव अधिकार तथा शान्ति समाजले स्थापनाकालदेखि नै युद्ध निषेधः शान्ति विशेष अभियान सञ्चालन गरिरहेको छ ।
समाजका तर्फबाट

सरिता पौडेल
उपनिर्देशक, मानव अधिकार तथा शान्ति समाज
११ फागुन २०८०

प्रेस विज्ञप्ति
३४ बालिकालाई तेस्रो वर्षको छात्रवृत्ति प्रदान
‘छोरी पढाऔ: गरिमा बढाऔँ’ भन्ने आह्वानसहित मानव अधिकार तथा शान्ति समाजले प्रारम्भ गरेको पाँच वर्षे बालिका छात्रवृत्ति अभियान अन्तगर्त ३४ जना विपन्न दलित समुदायका बालिकालाई तेस्रो वर्षको छात्रवृत्ति प्रदान गरिएको छ । मोरङ जिल्लाको थलाहामा २०८० फागुन ८ गते आयोजित कार्यक्रममा कटहरी गाँउपालिका, थलाहास्थित श्री जनता मा.वि का २७ जना र धनपालथान गाउँपालिका दादर वैरियाको सरस्वती मा.वि.का सात जना गरि ३१ जना बालिकालाई वर्ष २०८० को तेस्रो वर्षको छात्रवृत्ति रकम प्रत्येकलाई रु. १२ हजार प्रदान गरिएको हो ।
शान्ति समाज मोरङ शाखाका सभापति प्रा.डा जीवन ढकालको सभापतित्वमा सम्पन्न कार्यक्रममा शान्ति समाजका सभापति रामकृष्ण बराल, वरिष्ठ उपसभापति कृष्णबहादुर रावल र सविच लक्ष्मीनारायण मिश्रले शान्ति समाजद्वारा सञ्चालित बालिका छात्रवृत्ति अभियानबारे प्रकाश पार्नुभएको थियो ।
२०७८ सालबाट प्रारम्भ भएको पाँच वर्षसम्म प्रदान गरिने यो छात्रवृत्ति अभियानका लागि शान्ति समाजका सदस्य तथा शुभचिन्तकहरु शैशव खनाल र आर्या पाण्डेका अभिभावकहरुले चार जना, रामप्रसाद जोशीले दुई जना, अपूर्वा शर्माले दुई जना र उर्मिला पराजुलीले दुई जनालाई सहयोग प्रदान गर्नु भएको छ । यसैगरी अधिकारकर्मीहरु रामकृष्ण बराल, गोविन्द खनाल, होमकान्त चौलागाई, उत्तम पुडासैनी, रत्नलक्ष्मी श्रेष्ठ, कृष्णबहादुर रावल, डिकप्रसाद घिमिरे, विकास थापा, नम्रता खरेल, सुदीप रिजाल, किरण ढकाल, भेषराज पोखरेल, डिल्लीबहादुर कार्की, दिलबहादुर कार्की, कोमलप्रसाद शर्मा, यमुना कँडेल, रामबाबु दाहाल, लोचन रिजाल, राजेन्द्र खनाल, भैरव रिजाल, अच्युत बराल, मीना चौलागाई, राधिका खनाल, लक्ष्मी बरालले यो छात्रवृत्ति अभियानका लागि सहयोग गर्नुभएको छ ।
समाजका तर्फबाट

सरिता पौडेल
उपनिर्देशक,मानव अधिकार तथा शान्ति समाज
मिति: ८ फागुन २०८०

प्रेस विज्ञप्ति
इजरायल सिर्जित त्रासदी विरुद्ध शान्ति समाजको प्रदर्शन

सन् २०२३ को अक्टोवर ७ का दिन हमासले दक्षिणी इजरायलमा गरेको आतंकी हमला पश्चात शुरु भएको हमास इजरायल युद्धको चार महिनामा २८ हजार भन्दा बढीको मृत्यु भएको छ । त्यसमध्ये २७ हजार प्यालेष्टिनी र १२ सय बढी इजरायली छन् । ६४ हजार बढी घाइते भएका छन् । यसैगरी कमिटि टु प्रोटेक्ट जर्नलिष्टका अनुसार ८५ जना पत्रकार मारिएका छन् जसमध्ये ७८ जना प्यालेष्टिनी, ४ जना इजरायली र ३ जना लेबनानी छन् । १६ जना पत्रकार घाइते ४ जना हराएका र २५ जना पक्राउ परेका छन् । इजरायल सिर्जित त्रासदीका कारण गाजामा १९ लाख बढी प्यालेष्टिनीहरु विस्थापित भएको समाचार प्रकाशमा आएको छ । एकातिर युद्धविरामका लागि अन्तर्राष्ट्रिय समुदायको बारम्बारको आग्रहलाई इजरायलले वेवास्ता गर्दै आएको छ भने अर्कोतिर युद्धका कारण निर्दोष प्यालेष्टिनी नागरिकहरु मारिने र विस्थापित हुने क्रम बढ्दो छ ।
यसै सन्दर्भमा आणविक अस्त्रको विश्वव्यापी उन्मुलन र युद्ध निषेधः शान्ति विशेष अभियान सञ्चालन गर्दै आएको मानव अधिकार तथा शान्ति समाजले २०८० माघ २९ गते दिउँसो काठमाण्डौस्थित इजरायली राजदुतावास अगाडि युद्ध विरोधी प्रदर्शन गरेको छ । इजरायललाई तत्काल युद्धविरामको घोषणा गर्न र मानवता विरुद्धको अपराध बन्द गर्न आग्रहसहित गरिएको आधा घण्टाको प्रदर्शनमा सहभागिहरुले इजरायलः तत्काल युद्धविराम घोषणा गर, इजरायलः निर्दोष प्यालेष्टिनीहरुको हत्या बन्द गर, इजरायली बर्बरताले मानव सभ्यता लज्जित, युद्ध समस्याको समाधान होइन, इजरायलः मानवता विरुद्धको अपराध बन्द गर, इजरायल युद्ध रोकः शान्ति प्रवद्र्धन गर लेखिएका प्लेकार्ड प्रदर्शन गरेका थिए ।
प्रदर्शन पश्चात इजरायलका प्रधानमन्त्री बेन्जामिन नेतान्याहुलाई शान्ति समाजका तर्फबाट लेखिएको पत्र नेपालस्थित इजरायली दुतावासले बुझ्न नमानेका कारण हुलाकबाट पठाइएको छ । पत्रमा “इजरायल सिर्जित त्रासदीका कारण गाजामा १९ लाख बढी प्यालेष्टिनीहरु विस्थापित भएको, हमासको आतंक निन्दनीय भएको तर कहालिलाग्दो यो युद्धले झनै ठूलो आतंक सिर्जना गरेको दुखद अनुभव मानव अधिकार तथा शान्ति समाजले गरेको उल्लेख गर्दै तत्काल युद्धविरामको घोषणा गर्न, मानवता विरुद्धको अपराध बन्द गर्न, युद्धलाई सदा सदाको लागि अन्त्य गर्न र शान्ति प्रवद्र्धन हेतु ठोस योगदान गर्न” इजरायललाई आग्रह गरिएको छ । प्रदर्शनमा ३० जना शान्तिवादीहरुको सहभागिता थियो ।
स्मरणीय छ, मानव अधिकार तथा शान्ति समाजले इजरायलको बर्बरता र हमासको आतंक दुवै विश्व शान्तिका लागि खतरा बताउँदै आएको छ ।
समाजका तर्फबाट

सरिता पौडेल
उपनिर्देशक, मानव अधिकार तथा शान्ति समाज
२९ माघ २०८०

प्रेस विज्ञप्ति
आलु प्याजमा कर लगाउने सरकार स्वयं अरबौको कर घोटालामा लिप्त

एनसेल महाघोटालादेखि भ्रष्टाचारका अनेकौ घोटाला विरुद्ध प्रहार गर्दै ९३ औँ शान्ति काव्य प्रवाह सम्पन्न भएको छ । मानव अधिकार तथा शान्ति समाजद्वारा २०८० माघ २५ गते काठमाण्डौमा आयोजित शान्ति काव्य प्रवाहमा रचना प्रस्तुत गर्दै स्रष्टाहरुले ४० अरब वार्षिक आम्दानी हुने कम्पनी ६ अरबमा विक्री भएको भनिएकोप्रति व्यङ्ग गर्दै नेताहरु स्वयं विक्री हुन थालेको भाव व्यक्त गरेका थिए । जनतालाई आलु प्याजमा कर लगाउने सरकार अरबौको कर घोटालामा स्वयं लिप्त भएको भन्दै स्रष्टाहरुले आक्रोश व्यक्त गरेका थिए । काव्य प्रवाहमा शहीदहरुप्रति श्रद्धाञ्जली अर्पणसहित कवितासमेत वाचन गरिएको थियो ।
समाजका सभापति रामकृष्ण बरालको सभापतित्वमा सम्पन्न भ्रष्टाचार विरुद्ध केन्द्रीत ९३ औँ शान्ति काव्य प्रवाहमा रामबहादुर पहाडी, रामेश्वरी पन्त, मेनका पोखरेल आचार्य, दुर्गाकिरण तिवारी, ललिता दोषी, लक्ष्मी एडी, रत्ननीधि रेग्मी, डा. बमबहादुर जिताली, भाग्यशाली अधिकारी, बाबुराम लामिछाने, रुद्र अधिकारी, भुवन शिवाकोटी, गगनदीप सर्व, विजयराज न्यौपाने, निर्मलरमण पराजुली, ओमप्रसाद कोइराला, मुकुन्द न्यौपाने, टेकबहादुर लौहारी, कृष्ण पहाडी सहित १९ जना स्रष्टाहरुले आफ्नो रचना प्रस्तुत गर्नुभएको थियो ।

समाजका तर्फबाट

सरिता पौडेल
उपनिर्देशक, मानव अधिकार तथा शान्ति समाज
२५ माघ २०८०